दाहाल सम्बन्धी ‘कुकुल्यान्ड’ खुलासाबारे भट्टराईको प्रतिक्रिया– नेपालकै निम्ति लज्जा
पूर्व प्रधानमन्त्री बाबुराम भट्टराईले टेलिकम भ्रष्टाचारमा अर्का पूर्व प्रधानमन्त्री पुष्पकमल दाहालको संलग्नता सम्बन्धी ‘कुकुल्यान्ड’ पुस्तकले गरेको खुलासा नेपालकै निम्ति निकै दुःखद र लज्जाको विषय भएको जनाएका छन्।
टेलिकम कम्पनीहरू स्थापना, शेयर खरीदबिक्री र नवीकरणका वेला हुने अनियमिततामा नेकपा (माओवादी केन्द्र)का अध्यक्ष पुष्पकमल दाहाल समेत जोडिएको विषयमा भट्टराईले बिहीबार आफ्नो धारणा सार्वजनिक गरेका हुन्। आफ्ना पूर्व सहकर्मीको नाम उल्लेख नगरी भट्टराईले सामाजिक सञ्जाल एक्समा लेखेका छन्, ‘नेपालको निम्ति निकै दुःखद र लज्जाको विषय यहाँका केही व्यवसायी र देशको प्रमुख कार्यकारी पदमा बसेका व्यक्ति पनि अन्तर्राष्ट्रिय गिरोहसँग जोडिएको र गम्भीर प्रकृतिका अनुचित र भ्रष्टाचारजन्य कार्यमा संलग्न भएको आरोप किताबमा लगाइएको छ।’
बेलायती पत्रकार टमले बरगिसले कुकुल्यान्डमा दशक लामो सशस्त्र द्वन्द्वको नेतृत्व गरेका दाहालसँग राजावादीहरूको निकट मानिएका अजेय सुमार्गीको सामीप्य मात्रै होइन, टेलियासोनेराको हेलो नेपालमा भएको लगानी, एनसेल खरीदबिक्री प्रकरण आदिमा उनीहरूको संलग्नता देखाएका छन्।
कुकुल्यान्ड : ह्वेर द रिच ओन द ट्रूथ पुस्तकमा आधारित भएर अनलाइनखबर लगायत सञ्चारमाध्यमले टेलिकम भ्रष्टाचारमा दाहाल जोडिएको समाचार गत चैतमा प्रकाशित गरेका थिए। साढे तीन महीना भइसक्दा पनि दाहालले पुस्तक र समाचारमा उल्लिखित आरोपको खण्डन गर्न नसकेका वेला भट्टराईले यो प्रकरणलाई देशकै निम्ति लज्जाको विषय भनेका हुन्।