त्रिशूलीमा हराएको बसका तीन यात्रु नारायणीमा मृत भेटिए
भरतपुरको सिमलतालमा पहिरोले बगाउँदा त्रिशूलीमा खसेको बसमा सवार तीन यात्रु नारायणी नदी किनारमा मृत भेटिएका छन्।
नवलपुरको गैंडाकोट नगरपालिका-७, गैरीस्थित नारायणी नदीको टापुमा शनिबार दुई जना मृत भेटिएका थिए। त्यस्तै, भरतपुर महानगरपालिका-२८, गोलाघाटमा एक जना मृत भेटिएका थिए।
मृत भेटिएका तीनै जना सिमलतालमा खसेको बसका यात्रु रहेको पुष्टि भएको जिल्ला प्रहरी कार्यालय, चितवनका प्रहरी नायब उपरीक्षक (डीएसपी) भेषराज रिजालले बताए। तीनमध्ये एक जना चितवनको माडी नगरपालिका-१ का २२ वर्षीय विकास परियार रहेको पुष्टि भएको छ। उनका दाजु विजय परियारले सनाखत गरेको डीएसपी रिजालले बताए। उनी वीरगन्जबाट काठमाडौंतर्फ गइरहेको बसमा भरतपुरबाट चढेका थिए।
उनीसँगै मृत भेटिएका अर्का व्यक्ति पनि सिमलताल घटनामा हराइरहेका यात्रु रहेको प्रहरीले जनाएको छ। सर्लाहीको बरहथवा नगरपालिका-३ का १९ वर्षीय रमितकुमार माझीको शव भेटिएको डीएसपी रिजालले बताए। उनका बुबा रवीन्द्रकुमार माझीले सनाखत गरेका छन्।
गोलाघाटमा मृत भेटिएका भारतको बिहारस्थित सीतामढी बर्गिनिया जमुहवाका २८ वर्षीय ऋषिपल साह रहेको पुष्टि भएको थियो। उनका दाइ सतपाल साहले सनाखत गरेका छन्।
काठमाडौंबाट गौर जाँदै गरेको बागमती प्रदेश ०३-००१ ख २४९५ नम्बरको बस र वीरगन्जबाट काठमाडौं आउँदै गरेको बागमती प्रदेश ०३-००६ ख १५१६ नम्बरको बस असार २८ गते बिहान साढे ३ बजे भरतपुर महानगरपालिका-२९ सिमलतालमा पहिरोमा परी त्रिशूलीमा खसेका थिए। काठमाडौंबाट गौर जाँदै गरेको बसमा सवार ३८ जना र वीरगन्जबाट काठमाडौं आउँदै गरेको बसमा सवार २७ जना हराइरहेका छन्।
उनीहरूमध्ये तीन जना मृत भेटिएका छन्। त्यस्तै, तीन जना यात्रु त्रिशूलीमा पौडी खेलेर बाँचेका थिए। अन्य यात्रुको सिमलताल र नारायणी नदी क्षेत्रमा खोजी भइरहेको चितवनका प्रमुख जिल्ला अधिकारी इन्द्रदेव यादवले बताए।
नेपाल प्रहरी, सशस्त्र प्रहरी र नेपाली सेनाको टोली तीन दिनदेखि खोजबिनमा लागेको छ। तीनै सुरक्षा निकायका गोताखोरको टोली परिचालन गरिएको छ।