महाधिवेशनले पूर्व माआवादी एक हुने ढोका खोलोस् : सीपी गजुरेल
नेकपा (क्रान्तिकारी माओवादी)का उपाध्यक्ष सीपी गजुरेलले पूर्व माओवादी एक हुनुपर्ने बताएका छन्।
नेकपा (माओवादी केन्द्र)को आठौं महाधिवेशन उद्घाटन समारोहमा बोल्दै उपाध्यक्ष गजुरेलले पूर्व माओवादी एकजुट हुन पहल गर्नुपर्ने बताए। “यो महाधिवेशनले पूर्व माओवादी एक हुने ढोका खोलोस्,” गजुरेलले भने।
त्यसका लागि देशभरबाट आएका प्रतिनिधिले छलफल चलाउनुपर्ने र नेतृत्वलाई दबाब दिनुपर्ने जिकिर गरे। पूर्व माओवादी एक हुन केही काम गर्नुपर्ने उनको भनाइ थियो।
सशस्त्र विद्रोह शुरू गर्नुअघिको माओवादी केन्द्रीय समितिले गरेका प्रतिबद्धतालाई पुनःस्थापित गर्नुपर्ने उनले बताए। यससँगै लिम्पियाधुरा, कालापानी र लिपुलेक फिर्ता ल्याउने प्रतिबद्धता जनाउनुपर्ने बताए।
माओवादीबाट छुट्टिएर मोहन वैद्यको नेतृत्वमा नेकपा (क्रान्तिकारी माओवादी) गठन भएको हो।
